ඉඟිනි මීටර් 5 -15 අතර උසට වැඩෙන දේශීය බහුවාර්ෂික ශාකයකි. කළු පැහැති ඉරිතැලී ගිය පොත්ත රළු ස්වභාවයක් ගනී. සම්මුඛව පිහිටන සරල පත්‍ර දිළිසෙන සුලුය. පොකුරු වශයෙන් හට ගන්නා මල් සුදු පැහැතිය. සෙ.මි. 0.5 පමණ විශ්කම්භයක් සහිත කොළ පැහැති ඵලය ඉදුණු පසු කහ පැහැයක් ගනී. බීජ ළා කහ පාටට හුරු සුදු පැහැයකින් යුක්තය. ඉඟිනි Loganiacea කුලයට අයත් ශාකයකි.
ඉඟිනි ඇට ප්‍රධාන වශයෙන් අක්ෂි රෝග සඳහා ප්‍රතිකාර කිරීමට භාවිතා කරයි. එමෙන්ම දාහය, කල්ගිය පාචනය, මුත්‍රා අඩස්සිය, වකුගඩුවල සහ මුත්‍රාශයේ හටගන්නා ගල්, ස්වාසනාලිකා ප්‍රදාහය, වණ ශෝත, කුෂ්ට රෝග, දියවැඩියාව ආදී රෝග තත්වයන්ට ප්‍රතිකාර කිරීම සඳහා මෙම ශාකයේ මුල්, පොතු, ගෙඩි, ඇට ආදිය භාවිතා කරයි.
ඉඟිනි ඇට යෙදීමෙන් මඩ සහිත ජලය පිරිසිදු කර ගැනීමට ආසියාතිකයින් බොහෝ කලක සිට පුරුදුව උන්හ. තවද ටැන්සානියාව වැනි අප්‍රිකානු රටවල මෙම ශාකයේ කොල ඇස් රෝග සඳහා ද, මෙහි මුල යොදා සකස් කරන පාන වර්ග ලිංගාශ්‍රිතව බෝවන රෝග සඳහා ද, මෙම කොළ යොදා සකස් කරන පාන වර්ග අපස්මාර රෝගයට ප්‍රතිකාර කිරීම සඳහා ද භාවිත කරයි. එමෙන්ම ඔවුන් මෙහි මුල තැම්බූ වාෂ්ප සෙම්ප්‍රතිශ්‍යාව සඳහා ද, මුල යොදා සකස්කරන ඖෂධ කාමවර්ධකයක් ලෙස ද, කැස්සට ප්‍රතිකාර කිරීමට ද යොදා ගනී. විරේක ඖෂධ වර්ග සෑදිමට, සර්ප දෂ්ඨන සඳහා ප්‍රතිකාර කිරීමේදී විෂ ඉවත් කිරීමටත් භාවිතා කරයි. ශරීරය සිසිල් කරයි. අක්ෂි රෝග තෛලය, චන්ද්‍රකාන්ති තෛලය, රාජතරංගණී තෛලය වැනි ඖෂධ වර්ග නිපදවීම සඳහා ඉඟිනි ඇට යොදා ගනී. ඉඟිනි මුත්‍රකාරක, වමනකාරක, විෂබීජ නාශක ආදී ගුණ සහිතයි.
මූලාශ්‍ර_ ඔසුතුරු විසිතුරු කෘති සහ අන්තර්ජාලයෙන්
