ගස් යට වැටුණු කෑල මල් රතු පලසක් මෙන් දිස්වන හෙයින් ඒ දකින සිවළුන් මස් කැබලි යැයි රැවටෙන බව ජනප්‍රවාදවල සඳහන් වේ. සිංහලෙන් කෑල, ගස් කෑල, ගස් කෑලිය ආදී නම්වලින්ද සංස්කෘතෙන් පලාශ යනුවෙන්ද හඳුන්වන රත්කෑල මීටර් 15 පමණ උසට අක්‍රමවත්ව අතු පැතිරි වැඩෙන මධ්‍යම ප්‍රමාණයේ දේශීය ශාකයකි. ගණකම් රළු පොත්ත පතුරු ගැලවෙන ස්වභාවයක් ගනී. දිගු නටුවක් සහිත ත්‍රිපත්‍රි සංයුක්ත පත්‍ර ඒකාන්තරව පිහිටයි. අග්‍රස්ථ පත්‍රිකාව විශාල වන අතර දිගින් සෙ.මි.12 හා පළලින් සෙ.මි.10 පමණ විය හැකිය. පුෂ්ප මංජරිය ඒකාක්ෂයකි. කලාතුරකින් බහුඅක්ෂ ද වේ. කෑල මල් දීප්තිමත් රතු තැඹිලි පැහැතිය. මලක් සෙ.මි. 4-5 පමණ දිගුය. එරබදු මලට සමානකමක් දක්වයි. ඵලය සෙ.මි. 15 පමණ දිග කරලකි. පැතලි බීජ උපවෘක්කාකරය. කෑල Fabaceae උද්භිද කුලයට අයත් ශාකයකි.
වාත රෝග, පිත්ත කෝප, ශ්ලේෂ්මල දෝෂ, වටපණු ආදී පණු රෝග, ග්‍රහණි, ශාරීරික අපහසුතා, නයි විෂ, ප්‍රදර රෝග, මූල රෝග, ගුද රෝග, චර්ම රෝග, ප්‍රවාහිකා, ගෙඩි, ගඩු, මුත්‍ර රෝග ආදියට ප්‍රතිකාර කිරීමට රත්කෑල ශාකයේ කොළ, පොතු, ඇට, මැලියම් ආදිය භාවිතා කරයි. රත්කෑල කොළ ශක්තිජනක, කාමෝද්දීපක, වණ ශෝධනය කරන තාපය හා දූෂිත වායු හරණය කරන ගුණ සහිත බවත් රත්කෑල මල් ධාතුවල උෂ්ණය සමනය කරන, කාමෝද්දීපක, රුධිය පිරිසිදු කරන සහ කැටි කරන ගුණ සහිත බවත් සඳහන් වේ.
උදර රෝග අතීසාර ආදියට රත්කෑල කොළ කෂාය හෝ යුෂ යොදා ප්‍රතිකාර කරයි. ගෙඩි පැසවීමට, ගඩුවලට සහ අණ්ඩවාතයට කොළ අඹරා ගෑමත්, මල් ජලයෙන් තම්බා අඹරා ගෙඩිමත තබා බැඳීමත් සිදු කරයි. අර්ශස්, කුසගිනි මදිකම සහ කාන්තා ලිංගාශ්‍රිත රෝග සඳහා කෑල පොතු කෂාය ගුණය. මුත්‍ර මාර්ගයෙන් ලේ පිටවන විට කෑල පොතු තැම්බූ වතුර බොන්නට දෙයි. පණු රෝග සඳහා කෑල ඇට ජලයේ බහා පිපුණු පසු පිට සිවිය ඉවත් කර ඇතුලත මඳය වියළා මී පැණියෙන් අනා දිනකට තුන් වරක් බැගින් දින තුනක් දී 4 වන දින උදයේ විරේචනය සඳහා එඬරු තෙල් දිය යුතුය. ගොනුසු විෂට කෑල ඇට වරා කිරෙන් අඹරා ආලේප කරයි.
විශාල කෑල ගසක් මීටර් 2 ක් පමණ උසින් කපා එහි වංගෙඩියක් මෙන් කුහරයක් සාදා එයට ඇට ඉවත් කළ නෙල්ලි ග්‍රෑම් 3840 පමණ පුරවා, කෑල ලීයකින්ම ඇබයක් සකස් කර කට වසා, එම කඳ වටා ගොම වැරටි ගොඩ ගසා ගිනි තැබූ පසු සෑදෙන සාරය යොදා ගෙන මිනිසකු අවුරුදු 300 ක් පමණ ජීවත්කර විය හැකි ඖෂධයක් සාදා ගන්නා අකාරය ගැන මහනුවර රජ සමයේ විසූ ශ්‍රි රත්නසේකර රාජ නම් වෛද්‍යවරයා විසින් රචිත අත්වෙද පොතක සඳහන්වේ. මෙය අතහදා බැලූ කෙනෙක් ගැන තොරතුරක් දැන ගන්නට නැත. කෙසේ වෙතත් මෙය වාජීකරණ රසාන ගුණ සහිත ඖෂධයක් විය යුතු බවයි විද්වත් අදහස.
මූලාශ්‍ර_ ඖෂධීය ශාක සංග්‍රහය සහ ඔසුතුරු විසිතුරු කෘති
2 comments:
ඒ පොතේ නම මොකක්ද ?
Man laga potha tgiyei mata message akak danna
Post a Comment