Smilax උද්භිද ගණයට අයත් දේශීය ශාක විශේෂ 3 ක් ලංකාවෙන් හමුවන අතර එයින් Smilax perfoliata මහ කබරොස්ස ලෙසත් Smilax zeylanica හීන් කබරොස්ස ලෙසත් හඳුන්වා ඇත. කබරොස්ස ආධාරක ශාකයක් මත නැගී වර්ධනය වන වැලකි. කොළ පැහැති කඳහෙි තියුණු කටු පිහිටා තිබේ. සරල ඒකාන්තර පත්‍රවල පත්‍ර තලය දිළිසෙන සුලුය. ඇතැම් විට පත්‍රමත සුදු පැහැති පුල්ලි දැක ගත හැකිය. පත්‍ර නටුව සමීපයෙන් හට ගන්නා පහුරු ආධාරක ශාක මත පැතිරී වර්ධය වීමට උපකාරී වේ. කොළ පැහැති මල් පුෂ්ප මංජරියක හට ගනී. ඵලය මදක් ගෝලාකාර බදරියකි. පොකුරු වශයෙන් දක්නට ලැබෙන කොළ පැහැති ගෙඩි ඉදෙන විට ක්‍රමයෙන් රතු පැහැයට සහ කළු පැහැයට හැරෙයි. ගෙඩියක් තුල බීජ දෙකක් පමණ පිහිටයි. කබරොස්ස Smilacaceae කුලයට අයත් ශාකයකි.
වාතරක්ත, සන්ධිගත වාත රෝග, ගෙඩි, වණ, පිළිකා, චර්ම රෝග, අක්ෂි රෝග සන්ධි ඉදිමුම්, ඔඩු සහිත තුවාල, බල්ලන් සපා කෑම වැනි රෝග අවස්ථා සඳහා ප්‍රතිකාර කිරීමේදී කබරොස්ස ශාක කොටස් භාවිතා කරයි. මෙහි මුල්, දඬු, ගැට, කොළ, දළු, අල සහ සම්පූර්ණ ශාකයමත් ඔසු පිණිස ගනී. කබරොස්ස යොදා නිපදවන අරිෂ්ට, චූර්ණ, රසායන වර්ග රැසකි. චීන අල නම් ඖෂධය නොමැති විට ඒ වෙනුවට කබරොස්ස භාවිතා කළ හැකි බව සඳහන් වේ. කබරොස්ස දේශීය කෘෂිකාර්මික කටයුතුවල යෙදෙන කෙම් ක්‍රම සඳහා මෙන්ම භූත විද්‍යා කටයුතු සඳහා ද උපයෝගී කර ගන්නා ශාකයකි. මුත්‍රකාරක, ස්වේදජනක, අග්නිකාරක, ඉදිමුම් නසන, රුධිරය පිරිසිදු කරන ආදී ගුණයන් සහිතයි.
දේශීය ජලභීතිකා වෙදකමේ රෝග විනිශ්චය සඳහා කබරොස්ස මුල් උපයෝගී කර ගනී. සපන ලද බල්ලාගේ විෂ ඇති නැති බව දැන ගැනීම පිණිස කබරොස්ස මුල් ඇල් දියෙන් ගලගා දෂ්ඨ ස්ථානයේ මතුපිට ආලේප කරයි. මෙම පරීක්ෂණයට අනුව විනාඩි 30 ක් පමණ කාලයකදී දෂ්ඨ ස්ථානයේ අමුතු වේදනාවක් හට ගනී නම් සපාකෑවේ පිස්සු බල්ලෙකු බව නිගමනය කරයි.
මූලාශ්‍ර_ ඔසුතුරු විසිතුරු සහ ඖෂධීය ශාක සංග්‍රහය කෘති සහ අන්තර්ජාලයෙන්
6 comments:
වටිනා ඉදිරිපත් කිරීමක්බෙහෙවින් අගයකරණවා .
වටිනා ඉදිරිපත් කිරීමක්බෙහෙවින් අගයකරණවා .
බොහොම ස්තුතියි ඔබට.
ඔය ඡායාරූපය කබරොස්ස නොවන බව සලකන්න.
දැනුවත් කිරිමට පින්, චීන අල වල විද්්‍යාත්මික නාමය කියන්න පුලුවන්ද
Good info
Post a Comment