වල් කොත්තමල්ලි සෙ.මි. 60 දක්වා ඉහලට වර්ධනය වන කුඩා බහු වාර්ෂික පැළෑටියකි. කඳෙන් ශාඛා අතු රාශියක් හට ගනී. සම්මුඛව පිහිටන කුඩා සරල පත්‍රවල පත්‍ර දාරය කඩතොලු සහිතය. පත්‍රයක් දිගින් සෙ.මි. 3.5 සහ පළලින් 1.5 දක්වා වර්ධනය වේ. පත්‍ර හැඩය ප්‍රත්‍යණ්ඩාකාර-ආයත සිට ප්‍රතිලන්සාර වේ. පත්‍ර නටුවෙහි මූලයෙන් හට ගන්නා සුදු පැහැති මල්වලින් ඕවලාකාර ඵල රාශියක් හටගන්නා අතර එ්වායින් ඇති වන බීජ මඟින් ව්‍යාප්තිය සිදු වේ. වල් කොත්තමල්ලි Scrophulariaceae උද්භිද කුලයට අයත් ශාක විශේෂයකි.
පැරණි දේශීය බෙහෙත් වට්ටෝරුවල පැණි බැබිල යනුවෙන් හඳුන්වා ඇති වල් කොත්තමල්ලි, වටිනාකම් රාශීයක් සහිත ඖෂධ පැලෑටියකි. ඔසප් චක්‍රයේ දෝෂ, විදුරුමස් ඇතුලු මුඛ රෝග, ශ්‍රවණ ආබාධ, දෘශ්‍ය ආබාධ, වමනය, ආමාශයික රෝග, සමේ රෝග, ලිංගික පද්ධතියේ රෝග, පරපෝෂිත ආසාදන, අක්මා රෝග, මුඛ රෝග, පෙනහැල්ලේ ආබාධ, අධිරුධිර පීඩනය, කැස්ස ආදී රෝග අවස්ථා බොහොමයක් සඳහා ප්‍රතිකාර කිරීමට මෙම ශාකයේ පත්‍ර, බීජ, මුල් සහ සම්පූර්ණ පැළෑටියමත් භාවිතයට ගනී. වල් කොත්තමල්ලි විෂබීජ නසයි. පිළිකා සහ ලියුකේමියාවට ප්‍රතිරොධීතාවයක් දක්වයි. තුවාල සුව කරයි. උණ සහ වේදනා නසයි. හෘදයට හිතකරයි.
විශේෂයෙන් මෙම ශාකයේ පස්පංගුව තම්බා බීම දියවැඩියාව සඳහා ගුණදායක බව ප්‍රකටය. වල් කොත්තමල්ලි මුල් මුත්‍ර ගල් දිය කිරීමට ප්‍රත්‍යක්ෂ ඖෂධයක් බව දේශීය වෛද්‍ය ශබ්ද කෝෂයෙහි සඳහන් කර ඇත.
මූලාශ්‍ර_ දේශීය වෛද්‍ය ශබ්ද කෝෂය සහ අන්තර්ජාලයයෙන්
0 comments:
Post a Comment