මූණමල් මීටර් 20 ක් පමණ උසට වැඩෙන කිරි සහිත දේශීය ශාකයකි. ළපටි කොටස්වල සියුම් බූවක් දක්නට ලැබේ. සරල පත්‍ර ඒකාන්තරව පිහිටයි. පත්‍රයක් දිගින් සෙ.මි. 15 සහ පළලින් සෙ.මි. 7 දක්වා වැඩේ. ළපටි පත්‍ර විල්ලුද ආකාරයක් ගනී. මෝරන විට සිනිඳු වේ. පුෂ්ප ඉතා සුවඳවත් ය. පොකුරකට 1-3 අතර සංඛාවක් පවතී. ඵලය තැඹිලි රතු පැහැති හෝ දුඹුරු පැහැති ය. ළපටි ඵලයෙහි සියුම් බූවක් පිහිටයි. බීජ දුඹුරු පැහැතිය. මූණමල් Sapotaceae උද්භිද කුලයට අයත් ශාකයකි.
දෙශීය වෙදකමේදී මූණමල් ශාකයේ පොතු, ඇට, ගෙඩි ආදිය දත් සෙලවීම, විදුරුමස් දියවීම, තොල් පැලීම ආදී මුඛ රෝග සඳහා ප්‍රත්‍යක්ෂ ඖෂධ ලෙස සැලකේ. එහිදී දන්ත රෝග සඳහා නිපදවන සෑම ඖෂධයකටම පාහේ මූණමල් පොතු එක් කෙරේ. එමෙන්ම හෘද රෝග, මුත්‍ර දැවිල්ල, මුත්‍ර සමග ලේ පිටවීම, කැස්ස, රක්තඅතීසාරය, කාන්තා රෝග, පණු රෝග, මොළයේ ආබාධ, ශරීර දාහය ආදී රෝග රැසක් සඳහා ඖෂධ තැනීමට මූණමල් ශාකයේ පොතු, මුල්, මල්, ගෙඩි සහ ඇට ආදිය භාවිතයට ගනී. මූණමල් ආහාර රුචිය වඩවන, විෂනාශක, දත් ශක්තිමත් කරන, පණුවන් නසන ගුණයන් සහිතයි.
මුත්‍රා සමග ලේ යාමට මූණමල් කෂාය බීමට දෙයි. රක්ත අතීසාරයට සහ සිරුරේ අධික උණුසුමට මූණමල් ගෙඩි කෑම යෝග්‍යය. මුත්‍ර දැවිල්ලට මූණමල් ගෙඩි 10ක් හෝ 12 කෑමට දීම සහ ගෙඩි මිටක් පමණ තැම්බූ වතුර බීමට දීම කළ යුතුය. දත්වල දුබලතා , දත් සෙලවීම අදියට මූණමල් පොතු ක්වාතය ගන්ඩුෂ කිරීම හා පොතු චූර්ණයෙන් දත් මැඳීම ගුණය. ළදරුවන්ගේ වියළි කැස්සට මුණමල් මල් 5 ක් හෝ 6 ක් වතුර මි.ලි. 5 ක බහා රැයක් තබා උදෑසන මිරිකා පෙරා බීමට දිය යුතුය. මූණමල් ඇට චූර්ණය දන්ත අංජනයක් ලෙස භාවිතා කිරීම, මූණමල් පොතු සැපීම, මුලේ පොතු කල්කය එළකිරි සමඟ දින තුනක් අළුයම පානය කිරීම අකලට දත් සෙලවීමට ප්‍රතිකාරයන් ය.
පැණිරස සහ කහට රස මිශ්‍ර රසයකින් යුතු මූණමල් ගෙඩි පළතුරක් ලෙස කෑමට ගත හැකිය. ළපටි දඬු දැහැටි දඬු ලෙස භාවිතා කරයි. දැවමය වටිනාකමකින් යුතු මූණමල් ලීය පාලම්, බෝට්ටු, හබල්, කෘෂිකාර්මික උපකරණ, මෝල්ගස්, කැටයම් වැඩ, අමල්මාරි වැනි ගෘහ භාන්ඩ ආදිය නිපදවීමට යොදා ගනී. තායිලන්තවාසීහු මෙම මල්වලින් ලබා ගන්නා සුගන්ධවත් දුව්‍ය නෑමෙන් පසු සිරුරේ ගැල්වීමට භාවිතා කරයි. මෙම මල් පැණි බහුලය. එම නිසා මූණමල් මී මැස්සන් ඇති කරන්නන්ටත්, වීදි අලංකරණය සඳහාත් වැවීමට ඉතා යෝග්‍ය ශාකයකි.
මූලාශ්‍ර_ දේශීය වෛද්‍ය ශබ්ද කෝෂය සහ ඖෂධීය ශාක සංග්‍රහය කෘති
සේයා රූ_ අන්තර්ජාලයෙන්
2 comments:
ස්තුතියි...
වීදුරුමස් දිය වීම සුව කර ගැනීමට ම ූණමල් පොතු තැම්බූ වතුරෙන් කට සේදීම
හොදයි ද?
Ow අනිවාර්යයෙන්ම
Post a Comment